Endi elordalyqtar úıine kógildir otyn qosý úshin paıyzsyz nesıe ala alady. Mundaı múmkindikti Halyk Bank usynyp otyr. Jýyrda ǵana Nur-Sultan qalasynyń ákimdigi, Halyk Bank jáne "ECOJER" qaýymdastyǵy ózara yntymaqtastyq týraly Memorandýmǵa qol qoıdy. Onyń aıasynda turǵyn úılerdi gazdandyrýǵa járdemdesý boıynsha joba iske qosylyp, Halyk Bank alǵashqy júz turǵynǵa úılerin gazben jabdyqtaýdyń ortalyq jelilerine qosý úshin paıyzsyz kredıt bermek.
Halyq ekologıalyq taza kógildir otynǵa kóshýdi jedeldetýi úshin qarjylyq yntalandyrýdyń qosymsha sharalaryn engizý asa mańyzdy. Osyǵan baılanysty áleýmettik jaýapty iri qarjy ınstıtýty retinde Halyk Bank úılerine gaz qosqysy keletin birinshi júz abonentke paıyzsyz kredıt bere otyryp "ECOJER" qaýymdastyǵynyń bastamasyn qoldady.
Halyk Bank Basqarma tóraıymy Úmit Shaıahmetovanyń aıtýynsha, Halyk Bank ekologıany jaqsartýǵa jáne aýa baseınin tazartýǵa baılanysty birqatar bastamalardy qoldaıdy.
– Búginde ekologıa máselesi óte ózekti, ásirese iri otandyq megapolıster úshin. Biz Nur-Sultan qalasyndaǵy turǵyn úılerdi gazdandyrý jobasyn qoldaýǵa daıyn ekenimizdi málimdedik. Joba qosý jumystarynyń barlyq kólemine eseptelgenin atap ótkim keledi, ıaǵnı bank gazdy turǵyn úıge jetkizýden bastap, barlyq qajetti gaz komýnıkasıalaryn qosýǵa jáne qajetti jabdyqty ornatýǵa paıyzsyz qaryz beredi. Bul – bizdiń elordanyń áýe baseınin saýyqtyrýǵa qosqan úlesimiz. Biz óz tarapymyzdan elordanyń bıznes-qoǵamdastyǵyn bizdiń bastamamyzǵa qosylýǵa shaqyramyz, – dep atap ótti Úmit Shaıahmetova.
Atalmysh aksıa Halyk Bank-tyń alǵashqy ekologıalyq bastamasy emes. Ótken jyly qarjylyq uıym Almaty qalasynyń ákimdigine ońtústik astanany gazdandyrý boıynsha qoldaý kórsetip, halyqtyń áleýmettik osal toptaryna jatatyn 92 turǵyn úıdi gazǵa tegin qosqan bolatyn. Olardyń arasynda az qamtylǵan otbasylar, kópbalaly jáne múgedek balalary bar otbasylar, tolyq emes otbasylar bar.
– Bul qysty bizdiń birqatar otbasylarymyz kógildir otynmen jylytylatyn jyly úılerde qarsy aldy, – deıdi Halyk Bank Basqarma tóraıymy.
Nur-Sultan qalasynda paıyzsyz kredıt berý baǵdarlamasynyń sharttary boıynsha turǵyndar 750 000 teńgege deıingi somaǵa, 18 aıǵa deıin jyldyq 0 paıyzben kredıt ala alady. Qaryzdy uıymdastyrǵany úshin ustalynatyn komısıa mólsheri alynǵan somanyń nebári 0,1 paıyzyn quraıdy.
Osylaısha, júzden astam otbasy gazǵa kóshýge múmkindik alyp, óz jaǵdaıyn edáýir jaqsartady. Bul – óz kezeginde atmosferaǵa zıandy shyǵaryndylardy azaıtýǵa yqpal etedi.
"ECOJER" qaýymdastyǵy Keńesiniń tóraıymy Lazzat Ramazanova áleýmettik mańyzy bar joba memleket basshysynyń elordany gazdandyrý jónindegi tapsyrmasyn oryndaýdy qoldaý maqsatynda iske asyrylyp jatqanyn atap ótti.
Pikir qaldyrý